नेपाली समाज अचम्मको लाग्छ कहिलेकाँही जबजब हाँस्यव्यग्य र पर्दाका चरित्रहरुको कुरा आउँदछ । मह जोडीको वनपालेको साधुराम सुकुम्वासीको चरित्र देखि राते काँईलाको चरित्र, हरिवहादुर मदनवहादुर देखि धुर्मुस र सुन्तलीसम्म, हामी कलाकारलाई पर्दाको चरित्रबाट धेरै चिन्दछौं । यो राम्रो कुरा हो किनभनें कलाकारको पहिचान चरित्रको अभिनयमा पनि हुन्छ तथापि कहिलेकाँही कलाकारको पहिचान चरित्रभन्दा बाहिर निस्कन नसक्दा अलिक ओझेलमा परेको त हैन भन्ने भान हुन्छ ।

यस्तै एकजना कलाकारसंग मेरो भेट भयो, निरु खड्का । दशकौदेखि हाँस्य श्रृंखला मेरी बास्सैमा ठ्याँसकुमारीको चरित्रमा अभिनयरत निरु खड्कालाई उनको नामले कम तर चरित्रको अभिनयले धेरै चिन्दछन् । जम्काभेटमा कुराकानी गर्दा मैले पनि केहि प्रश्न सोधे उनको व्यक्तिगत बिचार र अनुभवहरुमा केन्द्रित भएर केही बेर कुराकानी भयो, हरेक हप्ता पर्दामा दर्शकलाई हँसाउन आउने निरुलाई यतिका वर्षको अभिनय र अनुभवपछि मानव जीवनमा हाँसोको मूल्य के हो त भन्ने प्रश्न राखें ।

एउटा कलाकारको दायित्व अझ भनौं हास्य कलाकारको दायित्व र अहिले बढ्दै गएका सस्ता र अश्लिल कमेडिमा उनको बिचार पनि सोधें । निरु पर्दाभन्दा बाहिर अरु धेरै कुरा रहिछिन जुन मैले यस भिडियो मार्फत् देखाउन चाहेको छु। एउटी श्रिमती, आमा, बिधार्थी अनि कुशल तालिमप्रदायक पनि रहेकी निरुसंगको कुराकानी हेर्नुहोस् ।

प्रस्तुतिः सुयोग ढकाल