गण्डकी । गण्डकी प्रदेश सरकारको मुख्यमन्त्रीमा एमाले प्रदेशका संसदीय दलका नेता एवं निवर्तमान मुख्यमन्त्री पृथ्वीसुब्बा गुरुङले पनि दाबी गरेका छन् ।

आज दिउँसो राष्ट्रिय जनमोर्चा र जनता समाजवादी पार्टीको समर्थनको पत्रसहित उनले मुख्यमन्त्रीमा दाबी गरेका हुन् । जनमोर्चाका कृष्ण थापाको पत्र र जसपा प्रदेश कमिटीको पत्रसहित गुरुङले मुख्यमन्त्रीमा दाबी गरेको उनको निजी सचिवालयले जनाएको छ ।

गत बिहीबार विश्वासको मत प्राप्त गर्न नसकेका गुरुङले अहिले फेरि दाबी गर्नुलाई महत्वकासाथ हेरिएको छ । संघ सरकारले गरे जस्तै प्रदेशमा पनि दुबै तर्फबाट बहुमतको दावी पेश भएपछि संबिधानको धारा १६८ (७) अनुसार संसद विघटन हुन सक्ने आशंका वढेको छ ।

यसअघि विपक्षी गठबन्धनले हिजै कांग्रेसका संसदीय दलका नेता कृष्णचन्द्र पोखरेल नेपालीलाई मुख्यमन्त्री नियुक्त गर्न आग्रह गरेको थियो ।