भारतीय प्रधानमन्त्री नरेन्द्र मोदीको जीवनीमा आधारित चलचित्र ‘पीएम नरेन्द्र मोदी’ हलमा प्रदर्शन हुनुभन्दा पहिला मोबाइलमा आएको छ ।

एक भारतीय एप्लिेकसन इरोज नाउले वेबसिरिज ‘मोदी– जर्नी अफ ए कमन म्यान’ आफ्नो डिजिटल प्लेटफर्ममा रिलिज गरेको छ ।

१० एपिसोडमा बनेको वेब सिरिजमा मोदीको बाल्यकालदेखि देशको प्रधानमन्त्री बनेसम्मको कथा देखाइएको छ । भारतको एक सामान्य मानिस देशको प्रधानमन्त्री कसरी बन्यो भन्ने विषयलाई कथामा समेटिएको छ ।

सिरिजमा १२ वर्षको मोदीदेखि अहिलेसम्मको अवस्थालाई चित्रित गरिएको छ । वेब सिरिजमा मोदीको भूमिका फैसल खान, आशीष शर्मा र महेश ठाकूरले निभाएका छन् । फिल्ममा मोदीको तीन अवस्थालाई देखाइएको छ ।

सिरिजको हरेक एपिसोड ३५ देखि ४० मिनेटको छ । अमरउजाला डटकमका अनुसार सिरिजको हरेक एपिसोडमा मोदीको जीवनको कुनै न कुनै अध्यायको बारेमा जानकारी दिन खोजिएको छ ।