काठमाडौं । इजिप्टको स्वेज नहरमा विशाल मालवाहक जहाज फसेपछि उक्त जलमार्गमा आवागमन ठप्प भएको छ । यस जामपछि विश्वमा कच्चा तेलको आपूर्तिमा अवरोध हुने आशंका उत्पन्न भएपछि बुधबारदेखि तेलको मूल्य पाँच प्रतिशतले वृद्धि भएको छ ।

जलमार्गमा ठूलो जाम भएपछि इजिप्टले अन्य जहाजहरुको आवागमन सुरु गर्न स्वेज नहरको पुरानो च्यानल फेरि खोलेको छ । स्वेज नहर प्राधिकरणका एक अधिकारीलाई उधृत गर्दै कायरो न्युजले त्यहाँ अड्किएको ४ सय मिटर लामो, ५९ मिटर चौडाइ भएको फुटबल खेल्न चार वटा मैदान जत्रो जहाज निकाल्न आठ वटा डुंगा र मेशिनको प्रयोग गरिएको बताएको छ । जहाजलाई त्यहाँबाट निकाल्न अझ केही लाग्न सक्ने छ ।

पानामामा दर्ता एभरग्रीन शिपिङ कम्पनीको एभर गिभन नामक जहाजका कारण त्यहाँ दर्जनौं अरू पानीजहाजहरू अड्किएका छन् । अधिकारीहरूले जहाजलाई सुरक्षित बाहिर निकालेर स्वेज नहरमा ट्राफिक पुनः सुरु गर्ने बताएका छन् । जहाजका चालक दलका सबै सदस्य सुरक्षित रहेको बताइएको छ ।

अड्किएको पानीजहाज सन् २०१८ मा बनेको र त्यो दुई लाख टनको रहेको बताइएको छ । १९३ किलोमिटर लामो स्वेज नहरबाट विश्वको कुल व्यापारको १२ प्रतिशत व्यापार हुन्छ । यो एशिया र युरोपबीचको सबैभन्दा छोटो जलमार्ग हो ।