म्यानचेस्टर सिटी सेमिफाइनलमा
काठमाडौं । म्यानचेस्टर सिटी च्याम्पियन्स लिग फुटबलको सेमिफाइनलमा प्रवेश गरेको छ । प्रिमियर लिग क्लब सिटी लामो समयपछि सेमिफाइनलमा प्रवेश गरेको हो ।
बुधबार राति क्वाटरफाइनलको दोस्रो लेगमा जर्मन क्लब बोरुसिया डर्टमण्डलाई २–१ गोल अन्तरले पराजित गर्दै सिटीले अन्तिम चारमा स्थान बनाएको हो ।
सिटीले समग्रमा ४–२ को नतिजासहित आफ्नो स्थान सेमिफाइनलमा बनाएको हो । सिटीले पहिलो खेलमा डर्टमण्डलाई २–१ गोल अन्तरले हराएको थियो ।
घरेलु मैदानमा डर्टमण्डले अग्रता बनाएको थियो । खेलको १५ औं मिनेटमा जुड बेलिङघमले गोल गर्दै डर्टमण्डलाई अग्रता दिलाएका थिए ।
सिटीका लागि खेलको ५५ औं मिनेटमा रियाद महरेजले पेनाल्टीमा टिमका लागि बराबरी गोल फर्काए ।
७५ औं मिनेटमा फिल फोडेनले गोल गर्दै सिटीलाई २–१ को जित दिलाए । सिटीले अब सेमिफाइनलमा फ्रेन्च क्लब पेरिस सेन्ट जर्मेन (पीएसजी)सँग खेल्नेछ ।