पछिल्लो पाँच दिनदेखि कोरोना संक्रमितको संख्या घट्दो क्रममा

काठमाडौँ | गत बुधबारदेखि कोरोना संक्रमितको संख्या निरन्तर घट्दो क्रममा रहेको संक्रमितहरुको तथ्यांकले देखाएको छ । गत मंगलबार नेपालमा हालसम्मकै धेरै ९ हजार ३१७ जना संक्रमित भेटिएका थिए, त्यसयता निरन्तर संक्रमितको संख्या घट्दै गएको छ ।

गत बुधबार संक्रमितको संख्या अघिल्लो दिनको तुलनामा ७९ जनाले घटेर ९ हजार २३८ मा झर्यो । त्यस्तै बिहिबार बुधबारको तुलनामा ३९६ जना कम भएर ८ हजार ८४२ मा झर्यो । त्यस्तै शुक्रबार संक्रमितको संख्या ८ हजार ४६७ मा झर्यो । सनिबार पनि अघिल्लो दिनको तुलनामा कोरोना संक्रमित संख्या घटेर ८ हजार ४६ मा झर्यो । त्यस्तै आइतबार (आज) संक्रमितको संख्या सनिबारको तुलनामा एकै दिनमा ६७८ जनाले घटेर ७ हजार ३६८ मा झरेको छ ।

नेपालका कोरोना संक्रमणको अवस्था एकाएक बढेपछि अधिकांश जिल्लामा निषेधाज्ञा जारी गरिएको छ । हाल देशभर १ लाख १० हजार २६३ जना सक्रिय संक्रमित रहेका छन् । कोरोना भईरसको इन्डियन भेरिएन्ट आएसंगै नेपालमा संक्रमणको कारण मृत्यु हुनेको संख्या बढेको छ । पछिल्लो समय कयौं बिरामीले अक्सिजन तथा समयमै उपचार नपाएको कारण मृत्यु भईरहेको गुनाशो आईरहेको बेला हालै चीन र खाडीका नेपालीहरुले गरि १८ हजार ५०० भन्दा बढी अक्सिजन सिलिन्डरहरु नेपाल पठाएका छन् ।

नेपालमा हालसम्म कोरोना संक्रमण हुनेको कुल संख्या ४ लाख ५५ हजार २० पुगेको छ । आजसम्म ३ लाख ३९ हजार ७५६ जना निको भएका छन् । हालसम्म कोरोनाको कारण ५ हजार एक जनाले ज्यान गुमाएका छन् । यो मृत्युदर कुल संक्रमितको १.१ प्रतिशत हो ।

पछिल्लो २४ घण्टामा कति परीक्षण भए ?
आइतबार स्वास्थ्य तथा जनसंख्या मन्त्रालयले सार्वजनिक गरेको तथ्यांक अनुसार पछिल्लो २४ घण्टामा थप १९ हजार ४३९ जनाको पिसिआर परीक्षण तथा २४४ जनाको एन्टिजेन विधिबाट परीक्षण गरिएको थियो । यसरी परीक्षण गर्दा पिसिआर विधिबाट सात हजार ३१६ तथा एन्टिजेनबाट ५३ जनामा सङ्क्रमण पुष्टि भएको छ ।

नेपालमा हालसम्म २७ लाख ७० हजार ९८० जनालाई पिसीआर बिधिबाट परीक्षण गराइएको छ । मन्त्रालयको अनुसार पछिल्लो २४ घण्टामा देशभर ६ हजार ६४८ सङ्क्रमित निको भएर घर फर्किएका छन् । निको भई घर फर्कनेको संख्या शनिबार पाँच हजार ४५५ रहेको थियो । तथ्यांक अनुसार हाल संस्थागत आइसोलेसनमा सात हजार ८०८ तथा होम आइसोलेसनमा एक लाख दुई हजार ४५५ संक्रमित रहेका रहेका छन् । हाल देशभर ७०१ सङ्क्रमित क्वारेन्टिनमा रहेको मन्त्रालयले जनाएको छ ।