आज तोल ल्होसार
२२ पुष २०७५, आईतवार ०६:१०
ल्होसारलाइ लोसार, ल्होछार पनि भन्ने गरेको पाइन्छ । विशेषगरी हिमाली क्षेत्रको समुदायले मनाउने चाडपर्व हो । लोसार दुईवटा शब्द ‘लो’ + ‘सार’ मिलेर बनेको छ जस्को अर्थ भोट, भुटानी, शेर्पाली, डोल्पाली, इत्यादि भाषा अनुरुप ‘लो’ को अर्थ बर्ष र ‘सार’को अर्थ नयाँ भन्ने बुझिन्छ । खासगरी यो पर्व नयाँ बर्षको स्वागतका लागि मनाउने गरिन्छ ।
चिनियाँ समुदायवाट भित्रिएको अनुमान गरिएको यस पर्वलाई चिनियाँ भाषाको अधारमा मुसा (ज्यिवा), गाई (लअङ्), बाघ (ताग), विरालो (योस), गरुड (ड्रुग्), सर्प (ड्रुल्), घोडा (ता), भेडा (लुक), बाँदर (टे) चरा (ज्या), कुकुर (ख्यी) र सुँगुर (फग) गरी १२ वटा जनावरको नाम अनुसार प्रत्येक १२ बर्षमा दोहोरिएर पालो आउने गर्दछ । यसरी दोहोरीने चक्रलाइ ल्होहोखोर्लो भन्ने गरिन्छ ।
ल्होसार मध्येको सबैभन्दा पुरानो ल्होसार तोल ल्होसार हो । तोलको अर्थ समयचक्र हुन्छ । त्यसकारण यस ल्होसारलाई समयचक्र संवत्सर पनि भनिन्छ । नेपालका हिमाली जिल्लाहरु हुम्ला, जुम्ला, डोल्पा, मुगु, मनाङ्ग र तिब्बत तथा भुटानका मानिसहरुले पौष शुक्ल प्रतिपदाको दिनमा धुमधामका साथ मनाउने गर्दछन । विशेषगरी सोनाम ल्होसार जसरी नै मनाइने यो पर्वको दिन मात्र फरक हुने गर्दछ ।
