कुरानका कुराहरु : रमादान विशेष

हबिबा कुरान भन्दै आज यो आलेखलाई शुरु गर्न चाहन्छौं, ईस्लाम धर्ममा बिश्वास राख्ने अनि धार्मिक सहष्णिुताका पैरवी गर्ने सबैजनालाई यो आलेख उपहार ।

रमादान मा राम पनि छन्, दान पनि छन् । हरेक धर्ममा राम्रो, माया अनि सद्भावको सन्देश रहेका छन्, धर्म माया र मानवताको पर्याय हो । कुरानमा पनि केहि त्यस्तै तथ्यहरु पाइन्छ । उदहारणका लागि कुरानको ९४ को ५ देखि ६ यहाँ ल्याउन चाह्यौं । यस्मा पक्कैपनि दु:खका दिनहरु समापन हुनेछन्, दु:खका दिनहरु समापन हुनेमा शंका नगर्न आव्हन गरिएको पाइन्छ ।

जीवनको मर्मलाई मानवतासंग जोड्दै कुरानले दुख्खको र सुख्खको महत्व दुबैलाई देखाउन सक्षम छ । उता कुरानको २ को १५३ मा एउटा वडो गज्जबको वाक्याशं छ, कहिलेकाँही त म कुरान र श्रीमद्ध भागवत गीतामा पनि समानता पाउछु । यस वाक्याशंमा पवित्र रुपमा धैर्यता र प्रार्थना माथि विश्वास गर्न आव्हन गरिएको पाइन्छ, अल्लाह ति संग मात्र हुनुहुन्छ जस्मा धैर्यता रहन्छ । कहिलेकाँही बिश्वासी र अविश्वासीका कुरामा चाँही कुरानी विशुद्ध बिश्वासीका पक्षमा खरो उभिएको पाइन्छ तथापि गीतामा भनें परमात्मा तत्व हरेक हृदयमा रहने ब्याख्या गरिएको पाइन्छ । यद्धपि अन्तत हरेक वाक्याशं र उदहारणले मानवता र प्रेमको पैरवी दुबै धर्म ग्रन्थले गरेको छ ।

भागवत गीताको ४ को ६ मा कृष्णले आफु नाश नहुने र जन्म मृत्यु भन्दा पर र सबैको स्वामी रहेको बताउनुभएको छ । उता कुरानको पनि १११ को २ मा पनि अल्लाहको ब्याख्याको क्रममा जन्म मृत्यु भन्दा पर र सबैका स्वामी र पवित्र भनि ब्याख्या गरिएको पाइन्छ ।
बिभिन्न पथहरुमा एउटै गन्तव्यको कुरा पनि कुरान र गीता दुबैमा उल्लेख गरिएको छ । गीताको ४ को ११ मा कृष्णले मानवका अनेकन बाटाहरु हुन्छन् तर अन्तमा सबैजना म भएकै ठाँउमा आउनेछन् भनेंर भनेंको पाइन्छ । यसै भनाईमा आसन्न कुरानमा पनि २९ को ६९ मा जस्ले हाम्रो खोज र चाह गर्दछ हामी उस्लाई सहि पथमा लिएर जानेछौं भनी उल्लेख गरेको स्पष्ट छ । पथ र सत्यमार्गको कुरा दुबै ग्रन्थले उक्काएको छ ।

भागवत गीताको २ को ४७ मा कर्म गर फलको आश नगर भनी भनिएको छ । उता कुरानको पनि ७४ को ६ मा फल र फाइदाको पछि नलाग भनी भनिएको छ । कर्मयोगीहरुको प्रतिष्ठाका रुपमा दुबै ग्रन्थले हजारौं लाखौं वर्षदेखि सत्यमार्गको अविछिन्न प्रमाण दिएको छ ।
कुरान र गीतामा फरक पनि प्रशस्त छ तथापि सत्य अनि परमात्मातत्वको विषयमा दुबै ग्रन्थ एकै साथ चलेको छ । रमादानको पवित्र महिनामा सबैलाई प्रेमको सन्देश दिन चाह्यौं ।
सुयोग ढकाल
लाईभमाण्डु